MHIP Day Atanga Luangliam!
Mizo Hmeichhe Insuihkhawm Pawl Day chu hlung takin hmun hrang hrangah hman a ni a. Sawrkarin chawlha a puan avangin Mizoram pumah kan chawl a, hmun thenkhatah chuan Branch hnuaia Section te'n intihsiakna an nei a, thenkhatah erawh chuan Branch angin hun hlimawm tak hman a ni. MHIP ni bik heti anga hman hi a tha viau mai. Inpawlho leh intihhlimna hun neih te hi inpawh leh zualna tha a ni a, hman thiam chuan thil tha tak a ni. Amaherawhchu, thil zawng zawng hi a tha vek lo a, thiltha taka kan ngaih tam tak hian that lohna tam tak a nei thin reng a ni.
Hmun tam zawka MHIP member hi inchhunkhura dinhmun pawimawh tak chelhtu, nu an ni tlangpui. Nu dinhmun pawimawhzia leh hlutzia hi sawifiah theih a ni lo a, a tawna tawn chi a ni. 'Mipa te tihtheih chu, hmeichhia te paw'n an tive thei vek tawh' tih tawngkam te, mipa aia hmeichhia chungnunga sawina te pawh a awm ta fo mai. Engpawh nise, tunlai khawvelah hmeichhe dinhmun chawisanna a nasa tawh a, dan hnuaiah pawh humhalh anni nasa tawh hle. Thil tha tak pawh a ni. Amaherawhchu, mipa aia thiltitheia inngaihna leh chungnung zawka inngaihna hi thil tha lo tak a ni. Ropuina leh hmingthatna dawngin, hlawhtlinna chang pawh ni se, mipa chunga lengah inngaih ngawt tur a ni lo. Pasal fanau nei nu dinhmun chelh mekah phei chuan, mipa zahna leh nu a nihna hriatchian hi nu mawhphurhna pawimawh tak a ni. Thuhma kan zo!
A tira kan sawi ang khan, MHIP Day chu ropui takin, hmun hran hranah hman a ni a, intihsiakna hrang hrang neite pawh an awm. Hetih lai hian, ka lo vei ruk em em chu, inchhungkhur nu ber zan lama chhuah tam leh inchhungkhur uap tam loh hi a ni. Intihsiak a ni tawh hi chuan, tan a lo na tawh a, a tha ber nih tumnain min luhchilh a, thei tawk bak bak chhuahin; kan inkarchhuak thin. Zan tin deuh thaw inbuatsaihnan hun hman a lo ngai a, inchhunglum chhuahsan a ngai fo thin. Kan mizo kalphungah hian, nu hian inchhung enkawlhna hi an thawk ber a, sekrek khawih chu thuhran ni se; fate nunphung leh awm dan thleng hian, nu mawhphurhna hi a sang hle. Kan thian pakhat chuan, 'nu -in inchhungkhur a uaplum lohna atanga seilian naupang hi, khawtlang tan hian an hnawk loh vek paw'n an tangkai nep hle' tiin a sawi a. A dik viauin ka hria!!
Inchhung enkawltu leh uaptu, nu leh pa; khawtlang leh kohhrana an inhman viau phei chuan, fate enkawlna kawngah hlawhchhamna a tam duh zualin a rinawm. Kohhran leh khawtlang a inhman ka va hnualsuatin, ka do bur tihna erawh a ni lo. Thil reng reng hian, chintawk hi a nei thin. Kohhran leh khawtlanga inhmang viau si a, inchhungkhura fate nunphung leh zia kan ngaihthah lam zawk a ni. Kohhran leh khawtlang tana mi tangkai, a ban kan nih laia kan fate ban kan nih theih loh zawngin; kan kawngzawh lai a dik lo a ni ang. Khawtlang leh sakhua tlakchhiat chhan hi chhungkaw hlutna leh pawimawhna, kan bosan telh telh vang a ni pakhat. Kan va peng thui teuh ve!!
Nu te hi an ropui a, pa te ai hian kan ngaina zawk tlangpui awm e. Chhungkaw hlimthla an ni a, chhungkaw darthlalang pawimawh ber anni ti ila, kan sawisual thui lem lo ang. Chhungkuaa zirtirtu pawimawh an ni bawk a, fate zirtirtu annih avangin an awm dan leh nungchang thleng hian an fimkhur a ngai hle bawkin a lang. Hlimna te hi an thlen thei em em a, pasal tam hlimna, fate tan pawh a ni zel a ni. Chuvang chuan, nu mawhphurhna hi hriain, inchhung uaplum hi a tul hle tawh a ni.
Ziaktu pakhat chuan, hmeichhe awm tha duh lo zinga 85% vel hi chhungkaw kehchhia atanga bul tan an ni, tiin a sawi a; chhungkuaa lu ber pahnih pawimawhna leh an awmdan hian fate nun zel dan h a hril thui hle a ni. Paul C. Vitz-a’n “Family Decline: The Findings of Social Science” (Chungkaw tlakchhiatna chhan Social Science atanga zirchianna) tih a ziahah chuan heti hian a ziak: “America-a chhungkaw tlakchhiatna chungchang thuziak tam tak atanga thil chiang tak chu, a chhan bulpui langsar ber chu pate’n an dinhmun an luah zo lo, pa tam takin an chhungkuaa an mawhphurhna an hlen lo" tih a ni. Mizo khawtlang nunah pawh a dik viau awm e. Chutihlaiin, pate puitu, an kawppui, nute pawh a huam tel tho a ni tih erawh hre tel ila.
Khawtlang leh kohhran siamtha tur hian, inchhungkhur atanga hmalak hi a pawimawh ber a, chung siamtha tur chuan nu leh pa an pawimawh em em a, a bikin nu an pawimawhna a zual hle. Nu te chu fate'n an nel tlangpui kan tihtawh kha. Sawitu pakhat chuan, "Pa khuahkhirh loh nu tlawngawl leng hman ngah chu, khawtlang nun chhiatna bul a ni." tiin a sawi a. A dik hi ka'n tikhawp a!
Nu emaw pa emaw, inchhungkhur uap lum a, chenchilh tlat hi chhungkaw tan a tha a, a him bawk a ni. Function neih dawn leh intihsiakna a awm dawn avang emaw eng emaw vanga (kohhran leh khawtlang thil a) chhungkaw nu ber a chhuah a chhuah hian, fate nun kawng a tha zawngin a sial lo! Uap loh karah an kawng zawh an thlak thei hle a ni.
He thu hi, social site pakhatah ka hmu a. A tlangkawmnan ka'n tarlang teh ang.
* Mahni dinhmun (nu nihna) hre chiang turin tunlai khawvel hian nute a cho a ni.
* Fate hmangaih a, zirtir a, kawng dik kawhhmuh a, enkawl turin tunlai khawvel hian nute a cho a ni.
* Bible nena fate zirtir tur te, mittui nena tihtak zeta fate tana tawngtai fo turin tunlai khawvel hian nute a cho a ni.
* Mahni pasalte laka rinawm turin tunlai khawvel hian nute a cho a ni.
* Chhungkaw puitling leh zahawm, leh inchhungkhur felfai ni tura hmala turin tunlai khawvel hian nute a cho a ni.
* Faten Pathian tihna tak tak leh Lal Isua hriatna tak tak leh Thlarau Thianghlim pawlna tak tak an chan theihnana tawngtaisaktu, tanpuitu leh kawng kawhhmuhtu ni turin tunlai khawvel hian nute a cho a ni. (Camp/crusade ah ringawt fate pianthartir kan tum vek ta mai hi Mizo kristian nu leh pate kan kalsualna a ni.)
* Khawtlang nun chu chhungkaw tin nun a lo that hian siamthatin a awm nghal thin.
* Mahni chhungkua theuh atanga khawtlang nun siamthatna hna tan turin tunlai khawvel hian nute a cho a ni.
* Chutiang bawkin kohhran pawh.
Eizawnna ngialnghet nei tura fate fuih leh tanpui turin tunlai khawvel hian nute a cho a ni.
* Tum nei rana lehkha zir tura fate fuih fo turin tunlai khawvel hian nute a cho a ni.
* Mahni mamawh bak awt lo tur leh mahni thawhchhuah mil lova khawsa lo tura fate zirtir turin tunlai khawvel hian nute a cho a ni.
* Zahawm tak leh fimkhur taka, rinawmna nena mobile phone leh Facebook te hmang tura fate zirtir tur leh example ni turin tunlai khawvel hian nute a cho a ni.
