Tu sawi nge ka hre ta lo, 'Chhiar si loa ziakmi nih tum kan tam ta lutuk hi a buaithlak,' titu kha. He thu hi ka rilruah a riak reng thin a. Thu leh hla hi naupangte e ti lo hian ka ngaina ve hle a, chhiar mai duh tawk loin ka ziak ve fo thin a, ho tak ni mah se rilrua lang hrikthlakna a nih avangin nuam la ti a, ka ziak ve ta fo mai. Changkanna a rawn thlenhnu hian chhiar lam hi ka peih ta lo hle a, mah se ka mamawh hle tih ka hre chiang telh telh a. Tin, ziakmi nih tum chhiar peih si lo huagah ka tel ang tih hi ka hlau hle a. Ka theih chin chu ka chhiar ta zel a ni.
Hmanni lawka rawn chhuak, a tlangzarhna hun pawh siam ni lo. Zawrh chhuah tawp lehkhabu hi la hre lo kan awm nual ang. A ziaktu hian a buai chhuanlama a tlangzarhna hun a siam hran lo hi a la inchhir ang tih pawh a hlauhawm a ni. Mah se, a bu hlutna erawh a pawlh dal lo e.
He lehkhabu kan sawi mek hi, 'Kan Thawnthu' tih Hriatpuia Pa ziak niin, thuhma tel loin phek 188 a chhah a ni a. Kumin 2014 a chhuah a ni. A ziaktu leh Mizoram Publication Board-in an publish a ni. A man hi Rs. 110/- man a ni a. Copy 1000 niin, LV Art chhut a ni. He lehkhabu hi bung li a then niin, thupui hrang hrang hmanga thuziak 37 a awm a ni.
Mithiam tak tak ten lehkhabu an thlirna kan chhiar tawh thin ang. Tehna hrang hrang hmangin an teh a, an chip thin. Chung mithiamte karah chuan ka thlir dan ka puang dawn a ni a, keima tehna leh chip chipin ka rawn tar lang a ni tih hre hmasa ila a tha awm e. Bung khat zela thute hi kan en ho dawn a ni.
Bung 1-na: Zângkhai
He zângkhai huangah hian thu ziak pasarih khung a ni a. A malin in en teh ang aw.
1. A Phing Kha!:
He thu kan hmuh rual hian tam tak chuan eng nge anih kan hre kher lo mai thei. He lehkhabu ziaktu hian a naupan lai chanchin a rawn tarlanna a ni a, an hun laiin football a la tam loh avangin saphing hampuar an pet thin thu leh saphing nei tura tha an thawhdan a rawn tarlang a. A tawng pha chin tan chuan a lunglen thlak a, panlai nunah min hruai let a, sertawk hmanga inkhelh lai a rawn thual telte hian lung a tileng hle. Tin, he lehkhabu ziaktu hi sport lamah a tuiin hriat pawh a ngah hle tih a lang chiang hle a. Hmun danga a thu ziakah pawh heti ang hi hmuh tur a awm nual a ni.
Duhaiin a ziaktu hian a phek a renin a hriat a, hei ai hian han sawngbawl kualin han chai vir se la, a vawrh sang zualin a rinawm. Heti ang hun lai tawng pha lo tan chuan ngaihnawm lam ai mahin ninawm a kai thei a, a hunlai tawngpha tan erawh ngaihtuahnaah thil tam tak tilut thei a ni thung.
2. Television:
Hei pawh hi lehkhabu ziaktu hun tawn ngei mai, lunglen thlak tak leh nuihzatthlak sia ziah a ni a. A hun lai, a ziaktu'n, 'Nineteen eighties' a tih bawr vela an dinhmun a rawn tarlang a. Mitthlaah hmuh theih tur leh ngaihtuah theih turin a rawn ziak a, lung tileng takin a rawn chhawpchhuak a. A ngaihnawm mai bakah TV pawimawhna a rawn tarlang pah a, hemi karah hian tun laia tarmit vuah kan tamna chhan hi TV vang a ni ang ngem tiin zawhna tha tak a rawn zep bawk a, ngaihtuah a tithui hle.
Heti ang thu hi hmuh tur leh chhiar tur a awm nuk a. A ziaktu hian a sawngbawlna hmanrua hi dangdai deuh hlekin han chaw khawm se la tihte rilruah a rawn lang a, a hmaa thu nen hian sawngbawl kawp ta se a ngaihnawm zawkin a rinawm bawk. A tlawr lem lo a, a kal ngaiin a kal chho mawlh mawlh a, naupang thawnthu sawi te pawh a anna lai a awm. Hei hian a thiamna erawh a rawn pho lang tho si.
3. Lehkhathawn:
A chunga kan sawi ang thoin heti ang thu hi hmuh tur a awm nual a, a ziaktu hian a hunlaia a tawn hmangin a rawn ziak a. A hun lai tawng pha tan chuan lung tileng tak tho chu a ni. Mahse a tawng lo tan chuan ninawm a kai pha lek lek thei awm e. Hei hian a hlutna erawh a tichhe lem lo.
4. Nupui Nei Suh:
Hei hi, hei ngei hi a ziaktu tawn ngei atanga chhuak tih a hriat a, a ziaktu nupui hi a taka tawn a tichak awm.
A ziaktu hian a nupui neih atanga an chhangchhiat thleng hun a rawn thai kawi chho a, nupui neih hahthlakna lai chu a nupui hlau ru tak chungin a rawn aupui a, nupui la nei lo tan chuan huphurhawm takin a rawn hlap kang a. A tawpah chung harsatna a tawn ngei chu rawn vaw thlain nupa nuna thilthleng thin a nih thu leh nupui neih chu thil tha hmu an nih thuin a rawn kheuh thlu a, a nupui a veng nge maw ni? Nupui la nei lo tan chuan chhiar ngei ngei chi a ni.
Hetah pawh hian a phek hi a rawn ui leh viau! A thawibawih lai thu vel hi hei ai hian rawn zep tam hlek se la, chhiar a tinuam zual ngei ang. A lai laklawhah hian ninawm a tling hman tep a, dai erawh a kan hma lo.
5. SMS:
Fiamthu leh an thiante nena an in Message-na a ni ber a. Mizo te zinga fiamthu thiam Stephen Auhmun-a nena sms an inthawnna a rawn tar chhuak a, he thuziak hian beisei a pha lo a. A tawp thlengin a invawrh chho lo a, a ngai patin a kal a, ninawm leh ho a kai tep tep thin. Hlut erawh a hlu viau.
6. Chêtchhiatna:
A ziaktu'n a tak ngeia a tawn, hlawm thuma a rawn tarlan hi naupang thil ang maiin a tawi a, chhiar thuak chuan a ho lam a kal lek lek. Mahse, nuih bawm a su hawng tho. Ngaihnawm titura chhiar chi a ni lo na'ngin a chhiar a nuam fu thung. Hei ai hian sei se tih hi a chhiartute chuan an duh vekin ka ring.
7. Kan Thawnthu:
A bu hmingput chhan a ni. A hma thute ang bawkin a ziaktu tawn atanga rawn intan a ni a, thawnthu pangngai nia mi tam takin kan hriat ang hi ni loin, a ziaktu nun hlui, nun thawnthu a ni ti ila a dik ber awm e. An thian zaho chanchin a ni ber a. An hun tawn thenkhat rawn tarlanna a ni. A bu hmingput chhan ber a nih vang nge beisei a pha lo viau. Nuih tiza erawh a tam viau thung.
Bung khatna hi Zangkhai tih a nih angin a chhiar a nuam fu a, sang taka han invawrh chho dawrh a awm lo na'ngin chhiar a kal a, nuam titaka chhiar theih a ni.
Bung 2-na: Ram leh Hnam
1. Changkànna Changkâng Lo:
Bung hmasaa thu nen a inperh san fu mai. Changkanna thil hrang hrangin min chim nasatzia leh chu changkanna thil hrang hrang chuan Mizo te nuna thil pawimawh hrang hrang a hliah tawhzia leh thangthar ten an hriat tawh lozia a rawn tarlang ber a, a khaikhawmnaah pawh ti hian a rawn dah a ni.
'Kan changkanna hian kan Mizona hi dip ral lo se, Mizo takin changkang ila, Zonunmawi hi vul reng se; he Mizo hnam hi dam zel se ka ti. Ka va ti tak em!' tiin.
Thu tha leh zirtirna tha tak thu hi chhiar a nuam a, mizo thil leh pawimawh hrang hrang, tunlai changkanna vanga kan bosal tawh a rawn khaikhin chho hi a ngaihnawm mai bakah a tha hle a ni. A ziaktu rilru kan hmu a, ram leh hnam a veina thinlung pawh a langsar hle. Heti ang thuziak zirtir nei leh veina thu hi sawisel tur avang hle. I chhiar hunah pawh sel tur i van viau ka ring. A ziaktu thiamna chu chuan a hril awm e.
2. Man Nei Tlawmngaihna:
Hei pawh hi buk rit tak thuziak a ni. Ziakmi tam takin Tlawmngaihna chungchang hi an ziak fur tawh. Mah se heti ang zawnga ziak hi a tlem hle thung. Mizo te ti Mizotu tlawmngaihna hian man a lo nei em ni? Nge Man nei turin kan tlawmngai? Hei hi 'Mizo ka ni' ti chuan chhiar ngei se a duh awm.
Sawi tak ang khan ziakmi tam takin tlawmngaihna chungchang hi an ziak fur tawh a, thenkhat tan phei chuan ninawm a tling hial thei awm e. He thuziaktu pawh hian a tan tirah hian tlawmngaihna chungchang thuziak dang ang bawkin Mizo Pasaltha te a rawn tarlang nghal a, amaherawhchu a chheh dan a dang nghal mai a. Hei hian ngaihdan a rawn thiat chiang hle.
3. Hma Kan Sâwn Lo:
He thu hian a ziaktu ngaihtuahna thatzia a rawn tarlang chiang hle. Mi tinin kan hriat leh kan nuna thleng hi Hriatpuia Pa hian thlirna tlang dang atangin a rawn thlir a, a thlir sual lo vai vai teh a sin. Meizial chungchang a rawn thai te hi, hman atang tawhin lehkha varah laduangin kan tawn a. Hei ai hian hma a sawn theih loh em ni? tiin zawhna a rawn siam a. Hmasawn nan hmang ila a tha ngawt ang. A thu dang hi kan khel lo ang. Chhiar la i hre mai ang.
Phek a ui nge, a duh tawkin a inleng parh tawh? Kham hnap khawpin han ching kual se a that nen a duhtawk hma deuh a ni.
4. Thihna Leh Pangpar:
'Thihna hi khawvel tawp thleng pawha kan buaipui tur a ni.' tiin bul a rawn tan a. Bul a tan fuh ang bawkin a tawp pawh a fuh. Mitthi pangpar kan pek thin chungchang rawn sawiin pangpar inpek aiah pawisa inpe ta ila tih hi a thu ken a ni ber a, a ngaihnawmin ngaihtuahna a tithui a, he ngaihdan hi zawm a tha viauin a lang nghal. Hei hian a ziaktu'n min hruai kual thiamzia a tarlang chiang hle bawk.
5. Heta Hi, Mizo Thalai:
He thuziaktu hian Mizo thalaite min hrechiang hle tih a rawn pho chhuak a. Tunlai Mizo thalaite zia, tha lo tak tak, kan kalpui mek si a rawn tarlang. Mizo thalaite a rawn fuih chhunzawm a, tihian a tawp a rawn tlip a, ngaihtuahna a tithui hle.
'....Chumi piah lama kan nihna, Mizo min nih tirtu leh kan dam khawchhuahna tur lam hian kan lungril hi engtikah tak kam ve ang maw le...?' Mizo thalai tan chuan chhiar ngei tur chi a ni.
6. Mahni Tawng Pawh Thiam Hlei Lo:
Hei pawh hi thalaite fuihna a ni ber. Tawng pawimawhzia leh hlutzia a rawn chhawp chhuak a. Hnam dang tawng thiam tho sia mahni hnam tawng ngei thiam a tul thu leh mahni hnam tawng hlut a tulzia a rawn tlang aupui ber. Thalaite tan mahni hnam tawng thiam a tulzia hi thalaite hian he thuziakah hian hre thar ila a tha hle.
7. Sap Tawng Ngatin:
A tirah sap tawng chungchanga a thil tawn a rawn tarlang a, tawng mak sarang a nihzia a rawn chhui chho a, sap tawng kan hman nasatzia a rawn chhir chhoin hian chhiar a tinuam zual. Sap leh Mizo te a rawn teh chho a, an zalen laia thalaite kan chepzia a rawn chhep hian kan dinhmun a rawn hril tel a, lem a nuam hle. Pathian thu nen a rawn ri chho a, a hmawrbawkna pui ber pawh hi a Pathian thu raih bawk.
He thuziak hi chik taka chhiar ngai a ni. A tirah eng nge a sawi tum leh point hriat nghal a ni lo a, vawi khat chhiar thuak phei chuan a saikalh nuaihin a lang. Chik taka chhiar erawh chuan a thu laimu hriattheih a ni.
8. Mizo A Bo:
Ram leh Hnam huang a nih angin he thuziaktu hian a vei thil hrang hrang a rawn zep a ni a, he thuziak pawh hi vei nahawm a ni. Changkanna vanga Mizo thil tam tak ral tur dinhmuna ding, chhanchhuah thei ni si a rawn tarlang a. Sawrkar lam a rawn hrut hian a vawrh tha hle. Naupang awmtleina hlaa sap hla kan hman atangin a thil vei a rawn puang a, cheraw hmanga world record kan siam thlengin a rawn hrut a. Lem a nuam hle. Duh aiin a tawi a, hei aia sei hian ziak ta se a hlu zual sawt ngei ang.
9. Vai-Lala Mobile:
Vei tur dik vei loa vei kan ngah lutuk a rawn vei hian ngaihtuahna a tithui leh hle. Kan ram dinhmun dik tak hriatchian a tulzia leh thianghlim taka lan aiin thianghlim taka nun a tul tawh thu a rawn tarlang a. Ram veitu aw kan hmu thei.
10. He Rilru:
Style dangin ram veina thu a rawn thal a, tui harsatna chungchang, power. adt. He thlirna tarmit hi a fiah hle tih a hriat. Inmawhpuh tawnna ramah hian kan rilru theuh hi kan thlak danglam ngam a tul hle tih a rawn tichiang hle.
He bunga thute hi hei hi a tha ber tia lak fak tur hriat a har. Chu chuan a thufun lenzia leh thatzia a hril chiang awm e. Zirtir nei leh zawm theih, nunpui theih a ni. Thu ziak thenkhat ang hi chhiar tur a awm na'ngin chhiar kan mai erawh a har hle. Lem harsa lo tak tak a ni hlawm.
Bung 3-na: Hun Bik Nei
1. 'Mas Lunglen:
Kristiante hunpui ber hian lung a tileng a, lunglenna chuan panlainun a rawn tho a, liam tawh ngaiin nunhlui kan chhui thin. Chu chu hethuziakah pawh hian kan hmu. An naupanlai nun a rawn tarlan atang hian lunglenna tuipuiah a leu kual nasa tih a hriat hle. Thlasik hun nuam a tih dan a han sawi te hi a ril riau nia. Mahse, ka tarlang lo ang!
Heti ang thuziak hi ziakmi tam tak ten an ziak fur. Mahse, heti ang thu ziak hian ngainat a hlawh a, a ziaktu tawn chu eng pawh ni se chhiar a nuam thin. He 'Mas Lunglen pawh hi thu ziak tam tak ang bawk a ni a, mahse chhiar a nuam hle.
2. Sikni Êng:
'Hla hmanga thu ziah hi Hriatpuia Pa talen a ni,' ti ila ka sawisual tamin ka ring lo. He thu ziakah pawh hian Zikpuii Pa hla, 'Sikni Êng' hmangin thu a rawn chhep kual a, a chhiartute min hruai kuala kan thlawk delh delh thei hial nia! Heti ang hla hmanga thu ziak hi chu Hriatpuia Pa hian a thiam a ni. I chhiar anga i hre mai ang.
3. Amah Chu Mihring leh Pathian A Ni:
A biakin kawng thusawi ta zaih mai. Krismas boruak a rawn hrut chho a, Pathian hmangaihna a rawn kal pah a, thinlungin en tur dik en a tulzia pawh a rawn tarlang chiang hle. Pathian hnena tluk luh pawimawhzia pawh a rawn dahpawimawh hle.
Thu sei tak a ni lo a, thu tlanglawn tak a ni bawk. Krismas boruak sermon kan tih ang chi thuziak a ni a, chhiar a nawm em em laiin thlur bing bik nei a nihna hian ninawm a kai tep a, mah se a thu kal dik leh dam thlap hian min chhiar zawh tir tho.
4. Eden Kawngkhar An Hawng Leh Ta:
Patea hla phuah hmangin thu a rawn thai kual a, a thiamna a rawn chiang zel. A chunga kan sawi ang bawkin hei pawh hi a Pathian thu chho viau a, hla hmangin a rawn vawrh chhuak tha hle a ni.
Sei tak a ni lo a, mah se a hmaa thu nen a inlalawn chho hian chhiar a tininawm tep. A thu thatna hian dai erawh a thiat lo.
5. Lung A Leng Leh Ta:
Hriatpuia Pa hian a thil hmuh leh tawn hi a kal ral tir mai mai lo a ni tih leh a enliam mai mai lo tih hi a lang chiang hle. He thuziaka thu hman a thiamzia leh a chheh mawizia hi tarlan loh ka phal lo.
'.....vawt tih hmel takin a rawn kal phei hlân hlân a.' tih te, 'Zo zial a pak khu hlat hlat a,' 'Rairuang a lo rai zum pat a.' han tih te hi a va mawi tak em.
He thuziakah hian mihringnun a rawn tarlang chiang hle. Hringnun hi he thuziaktu hian a hmu fuh tih pawh a hriat hle. He thuziak hi tawi tak ni mah se a thui riau thung. Hei hian he thuziak hi a thatzia a tarlang awm e.
6. Rem A Tih Chuan:
Kum thar thu chah a ni ber. Hun kan hman hrang hranga mahni duh thua kal kan tum leh ruahmanna kan siam thin te chu Pathian rem tihna ni se a duh thu a rawn tar lang a. Jakoba 4:13-17 thu hmangain kum thar thuchah a rawn puang a ni ber mai.
Mi tam takin kum thar thuchah an ziakin, an sawi thin. He thuziak hi a tawi a, pawm pawh a nuam viau mai.
7. Kum hlui, Nun hlui:
PB Shelley hla, 'To a Skylark' hmangin bul a rawn tan a, thihna chungchang leh thihna avanga a then takte a rawn zep hian lung a kuai a, a ziaktu nunhluiah min chen tir thei hial. Heti ang thuziak hi hmuh tur a awm nuk na'ngin he thuziak tawi frl tak hi a buk rit tak pawl a ni ngei ang.
8. Hapta, Hapta..... A Ninawm:
Ram leh Hnam huanga khung awm tak a nih viau laiin hun bik neia kan hman thin a nih vangin he huanga khung hi a nih rinawm. Kum tina faina hapta kan hman chungchang a rawn thlur a, faina chungchang zep telin, faina hapta hman fo ngai hi a rawn kher a, a kher fuh hle. Fai tura inpuahchah a tul thu leh faina hapta hman a ni reng chunga kan bal chu a vei ber a ni.
He thuziak hi a khin hle. A dik bawk. Faina hapta hmang fo thin te hian chhiar ila kan hlawkpui hle ang.
9. Aw, Hun!:
Hun che vel hian Hriatpuia Pa hi a dek fuh thei hle tih he thuziakah pawh hian kan hmu thei. Hun liam ta te, hun kan hman dante rawn hrutin Rokunga hla a rawn la chhuak a, hunin hringnun chu rawn chawhfinin hun kan hman ral huna kan awm dan tur chu eng nge ni tiin zawhna ngaihtuah tithui tak a rawn zawt a ni. Hun danglam tawh lohnaah chuan kan thlarau hi khawiah nge a awm ang?
He thuziak hian mihring nun leh hun inkawpzia hi a rawn tarlang chiang hle a. Kan hringnun pumpui hi a hre chiang hle tih a hriat bawk.
Bung 4-na: Pawlhsawp
1. Ngaihtuahkima:
He thu hi kristiante Pathian chungchang sawina a ni. A ngaihtuahkimzia leh a ropuizia a rawn puanchhuahna a ni. Pathian thil ngaihtuahkimzia he thu ziaktu hian thiam takin a rawn tarlang a. Pathian ngaihtuahkimzia a rawn pho chhuahnaah hian a ziaktu ngei pawh hi a ngaihtuahkim hle tih a hriat. Mi pangngaiin kan ngaihtuah ngai loh a rawn chhawp chhuak a, chhiar a nuamin a kal hle.
2. I Tawngtai Ngai Em?:
Tawngtai pawimawhzia leh thatzia tarlanna thungaihnawm tak a ni. Natna vang te leh thil hrang hrang kan tawna tawngtaina hlutzia a rawn tarlang a ni. A ziaktu hian a hun tawn ngei hmangin tawngtaina hlutzia a rawn tarlang a, chhiar a nuam hle.
Heti ang thu ziak hi hriat tur a awm thin. A kalh kim tura dahchhuah niin lang mah se a hlu hle a ni.
3. Miten Min Chhiar:
A thupui atang hian a thu laimu tur chu kan hre sa awm e. Thawnthu tawi tak tak pathum hmangin kawlawm a rawn chelek a, kan nun hi miten an chhiarin, an thlir fo a ni tih a rawn tarlang a ni. A chunga kan sawi ang khian heti ang thuziak pawh hi hmuh tur a awm nual. A thu chheh dan erawh a ngaihnawm hle.
4. Khum:
Khum pawimawhzia hi ila chhut lo mai thei, Hriatpuia Pa erawh chuan a pawimawhna a rawn ching chhuak nalh hle. Ka sawi sei lo ang, chhiara fiah chi a ni. Heti hian sawi ang; A ropui hle.
5. Hmangaihna:
Hmamgaihna han tih hian kan beng a verh zar thin. He thu ziakah hian hmangaihna a rawn hrilhfiah lem lo na'ngin, hmangaihna awmzia erawh a rawn pho lang tho si. Thil hrang hrang hmangin hmangaihna pawimawhzia a rawn tar lang a, a laimu ber erawh Mizo humhalhna lam a ni daih thung. Chan loh khanah min chhuahpui chiang lutuk hi a ziaktu hi diar phawka chibai tlak a ni. Ka chibai nghal e!
Mizo chuan mizo ngei hmangaih se a duh thu a rawn tarlangte hi hnam hmangaihna atanga chhuak a va ni chiang em. Ti hian duh tawk ang!
6. Thawhrimna Mai:
Lehkhabu ziaktu piancham atanga he thu hi rawn piang niin a lang a, a hun tawn thenkhat atangin he leia kan cham chhung leh a vuakvet a rawn sawngbawl a, damrei hi thawhrimna mai a ni tih Bible sawi chu a dikzia a rawn tarlang a ni. Thu ngaihnawm tak a ni lo a, thu tha leh ngaihtuah tithui tak erawh a ni.
7. Duhthlanna:
Thawnthu tawi panga hmangin Duhthlanna pawimawhzia leh duhthlanna dik a pawimawhzia a rawn tar lang a, a tawpah Pathian pawimawhziaah chhiartute min rawn dinchhuahpui a, thu tha tak leh kohhran pal nek lo tak a ni.
8. Piangsual Kan Awm Tawh Lo'ng:
Taksa leh rilru lama mi pangngai phak lo te chanchin a tak ngei atanga a tawn, rilru dek taka rawn tar langin, kan vanneihzia a rawn pho chhuak a, a chung ami ang bawkin Pathian thu lamah a her hret a, mah se a her dan hi a tawk hle thung.
9. Aw, Zakai!
Isua leh Zakaia intawn lai boruak atangin thu tha tak a rawn tar lang a, chhandamna thu a rawn zep nalh hle bawk. Thawnthu tak ni ngeia langin a rawn zawm zat a, Zakaia chanchin nen hian inlaklawnna ruk riau an nei a, a dang hle thung. Hei pawh hian Pathian thu lam a pawl chho hle a, zawhna a rawn siam erawh hi chuan ngaihtuahna a ti thui fu.
'.... a hnung zuitute pawhin kei mi sual hi min mamawh lo em ni?'
10. Concert Ka En:
Kolasib khuaa T-Melody concert a en chungchang a rawn tar chhuahna a ni a. Hriatpuia Pa hi music lamah pawh a hniam lo hle tih kan hmu thei a, concert-na hmuna awm ang maiin chhiartute min awi. Mizo hla hmanga a rock theihzia a rawn tar lang hian ngaihtuahna a tithuiin, hei hi a tum ber pawh niin a hriat.
A thu chhiar hian music lam ngaina lotu tan chuan chhiar puat a awl hle ang. Thahnem ngaihna aw a lang zeuh zeuh a, a tumah hian a ziaktu hi a lut har mah mah a, a vuakvetah min kal ralpui teuh hle.
11. Ka Ngai Che:
Ka Ngai Che
Teh tawp a!
Thu puarpawleng mai mai erawh a ni bik lo.' tiin bul a rawn tan a, boruak zi nuaih nuaih karah tuemaw a ngaih thu a rawn hlap chho hi a va ngaihnawm tak em. A tlawr chho a, dim takin kan chhiar chho a, duhkhawp kan hmuh hmain min tawppui a, engkim maiin tuemaw a ngaihtir chuan ngaihtuahna a tithui zui a. Uiawm taka titawpin, 'Kan Thawnthu' tih chu kan khup ta.
He lehkhabu hian hlutna a nei, chu chu Mizo tawng a hmang dik em em leh chhutsual vang em em hi a ni. Famkim biai thei a ni lo tih chu kan hre vek ang. Ziah zawm loh tur leh zawm tur sual a awm zeuh zeuh a, punct. dik lo awm hlek hlek pawh a awm. A bu pum thlir erawh chuan tha tak a ni.
Kan Thawnthu hian hringnun a rawn ching nasa hle a, hei hian a hlutna hi a vawrh sang hle bawk. Duhsakna hlan chungin pasal tha tak ni zel se la, sal ata chhuak thuai teh se!
TB: Lehkhabu thlirna pangngai a ni lo tih leh ka hmuh dan mai a ni tih min hriatsak dawn nia u.
22022015
0850
