Thuhma: He thu hi, a tak behchhana ziah a ni.
A tleirawl chhuah hma, a rilru leh ngaihtuahnain duhthlanna a siam a, duhthusam ropui tak tak a neih lai chuan he khawvel hian engti angin nge amamawh tih leh amah siamtu'n engti angin nge a rawngbawl turin a lo ruahman lawk tih a hre bik hauh lo.
Zirna kawngah malsawmna a chang a, a rualpui hmeichhe zingah pawh a zahpuiawm loh tawkin a hawi ve lah lah thei. Nula pangngai a nih chuan a hma hun a thlir lawkna leh a lo ngaihtuah lawkna chu tihdanglamin a awm a. A tum loh kawngah kawng a zawh ta. Zirna a zo a, a lo ruahman lawk miah loh kawng chu zawhin amah siamtu Pathian tan chuan a pen chhuak ta.
Pathian tan ram zauh a, Amah la hre lote hnenah rawngbawlin a vanglai hun chu a hmang chho a. Natna leh beidawnna chuan vawi tam tak phai thli lumin a in bang a chhem ang maiin a chhem fo a, tah leh ngui chang tawk fo mah se, a rawng a bawl Pathian tan chuan a rinawm tlat a. Amahah chuan a rinna zawng zawng a nghat tak meuh meuh a ni.
Chu hmuna a rawngbawlna chuan rah a chhua ve hlek hlek a, vawi leh khata rah tuar tuar thei a ni lo tih hriain, a tuh a, a ching a, tui a pe a, a theihtawkin chu a hnathawhna hmuna a thlaite chu a enkawl a ni. Chung zinga a rah chhuah pakhat kal zelna tur ngaihtuah turin hmunpui lamah an zin chhuak a, hlawhtling taka an thiltih an tih zawh chuan a hnathawhna lamah an kir leh ta. Phaizawl sei tak maiah chuan an chuanna lirthei chu chak pangngai takin a tlan vawk vawk a. A rawngbawlna Patanin mal a sawm dan chu mak a tiin ropui pawh a tihle. A chhungrilah hlimna chhimbal a zam a, chu lirthei chhungah chuan Pathian chu a fak mawlh mawlh a. Vawi leh khatah a ri bur a, a thim ta mup mai! Vanduaina chuan chu ni chu kal kan se la chuan dam takin a hnathawhna hmun chu athleng tur. Mahse, a rawng a bawl sak Pathian chuan chawlhahdam turin a la ta. A rawngbawlna hmuna a in thleng loin A rawng a bawl sak Pa hnenah chuan a haw ta zawk a.
He lei khualzinna rama a zinna ram chu zawh tawpin chatuana chawlhna nuamah chuan a haw ta.
No comments:
Post a Comment