Hmelchhe Vanduaina!

Zai thiam an awm. Kungfu thiam pawh, chuti ang zelin he kan khualzinna ramah hian thiamthil hrang hrang nei an kat nuk mai. Thenkhat chuan an thiamthil hrang hrangte chu eizawnnan an hmang a, mi vannei tak niin kan ngai thin. Guitar lama tui deuh chuan Guitarists Steve Vai, David Gilmour leh Eddie Van Halen tihte an ngaisang em em a, an an chak a, Zai thiam leh zai lama tuiin khawvel huapa zai thiam an ngaisang a, an an chak a, Kungfu lama tuiin Kungfu lama thleng sang leh larte an ngaisangin, an an chak em em bawk. Chuti ang chuan mahni tuina lama thlengsang leh chungnungte chu kan ngaisang a, an mahni an kan chak thin.

Hetia ka'n ngaihtuah cheuh cheuh hian mak tih tak riau ka nei. Zai thiamin zai thiam an ngaihsan a, Kungfu thiamin kungfu thiam an ngaihsan lai leh an an chak lai hian Hmelchhia te hian Hmelchhia kan ngaisang miah lo a, Hmeltha te hi kan ngaisangin, an mahni an kan chak tlat thin hi a ni mak ta chu. A changchuan kan Mizo pi leh pute thu pakhat, 'Hmel a siamthat theih loh a, nungchang erawh a siamthat theih.' tih thu te hi ka haw lek lek thin. Hmel a siamthat theih tih thute lo chhiah ni sela tha tur a nia. Khung khawthlang sapho leh khawchhakho hmelthlakna lah khi keini, Tlawng hnar Bak puk chhunga Sathi tawih kawchhunga Tuhrik pawh tluk zo lo hian han neih ve phak rual a ni si lo. Hmel chu a siamthat theih ta, a siamna tur sum erawh NLUP hian a daih si lo! Hmelchhe vanduaina a va kal tluang em!

Nula ka'n rim ve te lah hian, kan chan loh tur tih chiang sa leh kan rilruin a phu, kan hmelin a phu lo te an han ni ta dah a, Zawlaidi antih fo te hi awm tak tak se tih chang kan nei fo nia! Tuahthing lak changte hian ngaw hnuaiah hian pa titi thiamin Zawlaidi hmelhmang leh a awm dan an sawi hre ranin ka'n zawng ru du du a, 'han hmu hlauh ila chuan, tuikhur veng nula kha ka tat ang......' kan han ti rilru a, hmu ni leh tah ni awm lo, duhthusamin hun kan hmang zo der zel. Isaia'n, '.....Pianhmang thatna leh hmel mawina reng reng a nei lo va; amah kan hmuhin amah kan duhna turin mawina reng reng a awm lo.' (Isaia 53:2) a tih thute hi keini hmel lama vanduaite min tihchhan bik riau hian ka hre pek a. Ka chhiar tha duh mang lo! Heng thu ai chuan, 'Ka hang na a, ka nalh a nia...' tih thute kha keini tan chuan chhiar a nuam hle zawk. A hrim hrimin hmelchhiate hian fiam leh kah hi kan hlawh hma khawp a, rilru zau lem lo tan pawh hian zau ruk a ngai fu zel mai. Nupui hmu zo lo turah min han ngai rawk a, rilru chuan hmuh a inbeisei nasa ve hle si. Hmelthate tihmelthatu kan nih hi hmelthate hian an hre lo a, 'Lungpui pawh lungtein a kamki loh chuan a awm thei lo.' tih thute hi an hre lo emaw ni. Hmelchhiate hi awm lo ila, hmeltha an awm thei lo ang a, inangtlang vekin kan leng suau suau mai dawn a sin!

Nupui chungchang han sawi takah chuan thil pakhat han sawi tel leh ila, hmel lama vanduai tan chuan beidawn chang a tam duh phian mai. Mahni tawkah eng emaw ve riaua inngaih hi awl tak mai a ni a, chutih lai chuan nupui tur kan han melh ru ve ngial a, bei a dawng rum rum zel mai. Mahni phu tawka kan ngaihte hian kan lamah seih khat pawh an han seih duh lo a, biakthat poh leh min hlau emaw tih mai tur hian min han be tha duh lo a. Bei chu dawng duh tak a ni. Nula lamah bei a dawn zual hnu, beiseina a thih tep hnuah nuthlawi lamah tan kan han la thar a, veng leh lama nuthlawi thar lam deuh hlek an awm hian beiseina a sang zual sauh thin. Kan han hnim hnai a, an fate ei tur nepnawi nen kawrlum lian chi ipte puar lung chungin ka'n rim ve tlauh tlauh a, mit mei hmuh inbeisei em em chungin zan tin deuh thaw tap kan kuan a, an pasal thente nen an han inrem leh hlauh a, an fate nepnawi kan kensakna, dawr ba pek hi a phurawm vak thin lo. Nuthlawi leng rei deuh tawh lah hian pasal neih hi an tum lo emaw ni, vawkchaw chhum pahin min han kawm a, fa an neih tawh avangin fa nei lote hi min ngaihthah ni ber hian ka hre thin. Tlem lama uai thla tawh, suk hnih thum vel bak daih lo tur lah hi kan han iai ve tum hrang a, a chang chuan iai loh tur tur hi kan iai niin ka hre fo thin!

Mi thiam thenkhatin, 'zawng thlah kan ni e,' antihte hi a tichiangtu kan nih hmel riauin ka hre ru thin a, a thlahah pawh a thlah sual deuh hlek kan ni hial ang! Chuti ang hmel pu tan chuan nupui hmuh zawh chu har tak a ni. Hmel lama vanduaina han phurh a, zahna tam tak han pal chang leh nupui tur han hmuh zawh miah lo chang hian min thlahtute thlarau hi hauh chiam a chak awm rum rum fo thin. Han dem zeuh chang erawh a awm lo thei lo! Eng pawh ni se, heti ang hmel kan put avang hian hmelthate an vanneih phah a, keini'n vanduainaa kan ruat hi an tan vanneihna a lo ni a, a lawmawm lamah ka ngai. Mi dangtan malsawmna leh vanneihna thlentu nih pawh hi a tha reng reng e.

08012016

0116htp