Emau Kawng Leh Thlasik Kawng

Thlasik hun chuan min la tuam a, chhepchher hram pawh a zawi tan hle. Zanin zan a nihna a hloh tan a, mawina hriatthiam phak loh khawpa ropui chuan par a chhuang mek a. Van zawlah mawina chu sawifiah thiam loh khawpin a vul mek bawk. Hriatthiam phak loh mawina hi engti ang fakaua mawi nge a nih ang tih ngaihtuah tumin tha ka seng fo a. Hriatthiam phak loh ni na na na chu ka hre thei hauh lo. Mawina tihah hian mawina hi a kim a, chu mawina kim chu ka duhthawh luatah a kim lo zawk hialin ka la hre ta cheu mai.

A khai! Khi, chhak kawlrawn mawi turin turnipui'n a fem a rawn chhuah tan khi. Aw! A fem dawng phaa mawina chawihtu boruak kan la hip hi mawina zuthlum kan dawt a ni hawt e. Khi ta khi thlasik kawng a zam paw chiai mai le. A va mawi em. Tehkher a! Emau dai reha khualzin pahnih kalna kawng tih lohah chuan khi kawng khian Zofate thinlung hi a luah ber awm e. Siamkima’n a sawi, hman atanga Mizote thinlunga cham reng thin leh tun thlenga kan rilru la luahtu, mahse, hun inthlakin a rawn thlak phut avanga kan hnuchhawna kan tukkhuma betta Jordan lui kam thilin Rih dil a rawn luahlan ang deuhin Emau dai kawng chuan thlasik kawng hlutna a rawn chim pil a, chu Emau kawng chuan changkanna thil hrang hrang a rawn thlen zut zut a, tunah chuan min chim hneh ta hle. Changkanna kawnga kan pen suau suau lai hian kan Mizo-na theihnghilhin, ram dang thilah kan buai a, kan Mizo thil hrang hrang chu kan hnuchhawn ta. ‘Whatsapp’ kan hriat em em laiin, ‘Khelawk’ kan hre lo a. Korean film star kan hriat em em laiin, Buizova chanchin erawh sawi tur kan hre mang lo! Tu tih dik loh nge ni ang?

Saw ta tlang inkhawh zui leh thlur sung saw i hmu em? I hmufiah vak lo ang. Paw deuh ruai kara lang riai saw. Kan ram neih chhun leh kan ta a nih saw. Kan ta ni turin hmanah khan min thlahtu ten an nunna hlanin, kan enkawl turin  min chhiah a nih hi. Mahse, mahni kan inngaihpawimawh luatah kan ram neih chhun chuan a mawina a hloh ta hret hret a nih hi. He kan ramah hian min thlahtu te thisen kha a la awm reng a sin. Ram dang mi, kan rama rawn awmte ke kar atangin min rawn au lawm lawm fo mai. A chang chuan an thisen au thawm hre ngam lo hian beng ka hup fo thin. Martar thisen, a lo thlawna thang leh tharin kan ral tir hi a zahthlak em a sin. Emau dai kawngah hian kan kal suau suau a, thlasik kawng erawh chuan zawhtu a nei mang lo a. A sir velte chu hnim hnawkin a bawh luk a, a kawngahte pawh hnim a to ta sung mai. He kawng pawimawh em em hi kan samfai vat loh chuan zawh tlak loh khawpa a hnim hunah chuan kan hnam chu a ral tawh ang. Kan harh chhuah a, kan kawng zawh mup mup hi kan chhut chian a hun tawh a ni. Emau kawng hi kan hnualsuat vang leh kan duh loh vang a ni lo, kan zawh tur chu a ni. Kan zawh dan erawh kan chhutchian a, kal dan kan zir that a ngai a ni.

Thawk a ipik tlat tiraw? Khu, Nghasih ruama tle deuh siar siar khu i hmu em? Zokaisiktui a nih khu. Hmana lengin a lawmpa hahchhawl dawm nan a lo thal tawh tak a sin. Fiara pawh khan a tui hmuhchhuah chauh kha a in lo. Zokaisiktui kha dang hnawmah a hmang ve fo nia. Mahse, kan zotuithiang chuan hlutna a nei zo ta lo a. Ni lo, a hlutna kan pawh pha tawh lo a ni zawk. A tichiangtu chu kan lui (Kawr) tam tak a kangchat , lui tui tam tak chu ei tlak a ni tawh lo a. Hna tha a nei ta lo. Changkanna changkanglo hri kan vei hian min chimhneh em a ni.

Leihrik pau chu i hria em? I beng kha han dawh chiang la. Chu maw! Hla ropui an rem chu. A tenor leh  Contralto inchawihzia mawlh chu. Kawmthlang mau hnah ri seng seng kara rimawi rawn zam chhuak riai riai khuan i bengdar a rawn su ve em? Rimawi mawina hre lo tan pawh hriatna tham hliah hliah a mawi a ni. Mahse, I hre tha thei lo ang tiraw? Ka dem lo che! Changkanna changkang lo hri zinga ramdang rimawi leh chhepchher ten min chim hneh em a ni. Zothlifim fawn karah Lelthangin zaisain nichhun awmhar a kuan lai leh  Zadala mual pangper, nikang laia Bekte zar hnuaia thingpui sen hang dawmin, vau a Tukloh thawm chu ngaithla teh, i khua a tihar nge a tileng? E khai! Khipui, thimna hlimthla hnawh kian tumin kawlrawn a eng mek e. Chu, Thuva'n siahthing zar belin zai an sa ta;

"Seifa zaleng chham ang zalte u,

Harhin tho u law,

Kawlrawn engin thim a bo dawn e,

Harh ru! Harh ru!

Thim hnuaia zal Zofate;

Anpai hnehin phei khai u la,

In ram riang mawina vul tir leh rawh u."

A zai rem tura rimawi ri chu i hre thei em? Zingdaifim far ri leh hlobet harh ri a nih chu; A mawi zia chu i hria e. Hla ropui leh mawi min pe tuktin hi a ropui tiraw? Ngaihtuah teh, kan ram hi suamtu hian mawinain a lo thuam vek maw le. Khuarel leh siamchawp te hi a mawi vek mai tiraw? Chu a chhapah nang, mawina paw'n a thik khawp hiala mawi ka kiangah  I lo awm hi siamtu pawisawina a nih ka hlau hial nia.

A chang chuan ka duh mah mah che hi ka duh lo hial thin! Eng pawh ni se Van-i ( thirim lo la!), I thatna leh mawina chu vul zel se la, ka tana I mawina chu I hmel leh pumruaah a ni lo a, Mizo thinlung leh suangtuahna i put te, Mizo taka Mizo bai i ngainate hi a ni a sin. Ka lawman em em chu, ‘I miss You’ tih aia ‘Ka ngai che’ tia biahzai mi han hlan te hi a hlu ka ti thin.

Emau kawng leh thlasik kawng zawh rual dan I thiamna hi hmuh theih turin tarlang zel la, hunin hun a tih hun hunah Mizo thuam mawi tak nen Emau dai changkanna avanga kan neih Biakin chhungah Thrihna ka awrh tir ang chia, Tawlhloh puan mi la ban dawn nia. Tichuan, Mizo in ngeiah I rawn lawi ang a, arbawm-a lawi ar I khung zawhah zo artui mi la hip tir dawn nia!