F. LALTHANLIANA (1949-2013)

Vawiin hi hla phuah thiam F. Lalthanliana (kum 64) thih champhaphak a lo ni leh ta reng mai. Lung a va'n leng em. Kum 2013, August ni 10, chawhnu dar 1:30pm khan Malaria natna avangin LUNGLEI Civil Hospital-ah a boral a nih kha.

Fanai Lal Rorehlova thlah Thingsai Lal F.Lalbuana fa naupang ber F.Lalthanliana hi Kum 1949 December ni 16 khan Thingsai khuaah a piang a. Unau pakua ni in, mipa 5 leh hmeichhia 4 an ni a,a naupangber a ni. Mi kawm a thiamin, a titi kotlanga dah tawh chuan khawdang kan hawi thei tawh lo! Vawi tam kan inkawm a, thu tam,thu tha ka dawng nasa țhin. A zai ngaithla thei leh a titi kotlanga ka dakthei kha ka inchhuang a, ropui ka ti.

Pa Thana hian lengzem hla leh hla lenglawng bakah Pathian fakna hla engemawzat a phuah a. Saikuti ruhro Thingsai khua aṭanga Mizoram Archive-a an lak phei auh kir nana a phuah “Saikut Zaituah thiam” tih hla Sailothangi sak te kha tun thlenga sawi lar leh hla thiltihtheih zia sawinaa an hman a ni fo.  “Doral lian” tih te, Lalsangzuali Sailo-in a larpui em em ṭhin ‘Valkuahlawri' leh “Chun Nunnemi” tih te bakah “Hraichawi lengte,” Vanlalruati sak te chu a lar em em ṭhin. He hla phei hi chu kan hre deuh vek ang.

Țhangtharin amah kan hriatna hla phuah dangte chu - “Lung a leng em mai” tih leh "Engine lover" F.Laldinmawii sak te. “Khuamawii” Lalenkawli Pautu leh Lalropuii Pachuau sak te, “Lengtin Khumi” Lalenkawli Pautu sak te chu a lar hle a. Lengzem leh Hla Lenglawng bakah Pathian fakna hla “Lal Isuan Misual a lawm.” “Simin I pan ang u” tih hla Zomuanthangi sak te chu a hun lai chuan a lar ṭhin hle bawk. A hla phuah hnuhnung ber chu a u, Upa F. Lallura fapa F. Lalṭanpuia leh Julie Lalremsiami te inneih hla a phuah “Malsawm Dilna,” Bethsy Lalrinsangi'n May 29.2013 a sak kha a ni.

Hla tam tak a phuah zinga ka duh em em hi ka'n tarlang ang e.

LENGTINKHUMI

1. Zantiang awmhara suihlunglen changin,
Mahriakte’n laitual ka hrut vel a,
Lawina run vaiin zaitin ka chhiar a,
Tlai khua ka varpui si-ar mai pawh.

• Awmhar valeng riakmaw lo leng la,
Thiang maw tiin thing tin zawh lai bang la,
Luah lai run in sangpar dawh rema'n,
Zantiang chhin har lunglen i hril dun ang.

2. Kum sul sawm tam mah chhungkim len laini,
Chhingmit rauthlaa’n a hlui lo ve,
Hraileng hlimthla te hleite’n an dang lo,
Ka thlir ka ngai zual tah ka bang thei lo.

3. Ka lei parmawii, zaleng tin khumi
Lungmawl luat vanga sam ang then hnu,
A ngaia zanrei ar ang ka vaihna,
Thangvan chhawrthlapuia eng ruai mai.

[Dt.10.Aug.2016]

(Pic: 23.Sep.2012 a a zai lai thla ka lak.)