Zang vahin a sana bun a han en a. Thing, a hmawr suih mum ngei maiin Dar a'n vaw ri bal bal a. In Line ni a nih loh chuan Room lian berah kan tlan khawm a, tah chuan Devotion min neihpui țhin. Kan hla sak zin ber chu, 'Lal Isua kan țhianțha berin, Kan mangan laiin min lawm.' tih hla kha a ni. Sawi zauna a neih hma hian, naupang zing ațangin, 'Irish Tlanval....' lo ti an awm hman ziah țhin! Chutah sawi zauna an han nei hmasa te te a, rin ang ngeiin... "Irish tlangval Joseph M. Scriven chu nupui nei turin, hlim takin a inbuatsaih a, an inneih ni hma chiah-ah chuan a nupui tur chu tuiah a chesual palhin, a thi hlauh mai. Tichuan, hun a liam a, a nun bul țan țha turin Canada a pan ta a. Canada ah chuan zirtirtu hna thawkin a inbengbel a, Chu hmunah chuan Eliza Roche nen an intawng hlauh mai a. Inneih ngei tumin an inhual ta hial mai. Mahse hun a lo kal a, Joseph-a beiseina tibo tur chuan Eliza chu na taka dam lovin an inneih hma chuan a thihsan leh ta! A hmangaih em em Eliza thih lai bawr hian Joseph-a chuan an ram, Ireland-a a nu dam loh thu a dawng a. He tih lai hian vei vah zung zung theih a ni si lo. A nu hnenah chuan lehkha a thawn ta tawp a, chu a lehkhaah chuan a nu a thlamuanna thu bakah he hla a ziak tel bawk a ni....." tiin an han sawi zau a. Țawngțaina hlutzia leh thil dang, thu țha tak tak tawi fel takin a sawi zawm țhin.
Karkhatah khan vawi hnih Devotion kan nei țhin a. He hla hi kan sa zing ber ang! A sawi zauna pawh hi kan ngaithla fo thin a, han bengchheng fal kan awm ngai lem lo bawk. Bengchhen țum a awm pawhin, tumah a hau lo. A thusawi lai a sawi mial mial a, a danglam phah eih ngai lo!
'Pu Chibai-a' tiin kan/an ko fiam mai țhin. A hming dik tak chu C. Lalhlana a ni a, Pu Hlana kan ti mai țhin. Mi biangbiak thiam leh peih, hmun danga awm leh khaw dang mi a hmuha chibai buk țhin. Khawi emaw function, mitthi in, inkhawmna...adt. a thusawi leh zai, chanvo neite, an chanvo an tih zawhah lo chibai țhin. Hlawhtlinna changte chibai buk țhin a nih avanga 'Pu Chibai-a' tih a ni!
Inkhawmna leh zaikhawmna, Mitthi in leh khawharin-a khuang a rika lam nghal mai zel. Țawngțai leh Pathian fak nuam ti em em. Mi pawisawi ngai lo leh rel ngai lo, nupui fanau enkawl kawnga țha tawp khawk ( Ka uar sual lo!) Pu Chibai-a ngaina lo hi kan khuaah hian an tlem ngawt ang.
An sawi fo țhin. Khawvel lama tlan leh ruihhlo tițhinte pawh hian, 'Ani hian vanram a kai loh chuan, Haulawng-ah hian kai tur dang an tlem khawp ang.' A dik ang! Ani'n a kai loh chuan tu'n nge kai ang?
Lehkha a zir sang lem lo. Ziak leh chhiar a thiam ngawr ngawr chauh! Mah se, lehkha chhiar a peih a, thil a chik peih em em bawk. Hun rei tak ata tawh kan khuaa mitthi awm a piang, an hming leh kum, thih hun, ni leh thla, kum nen lam a chhinchhiah thlap zel.
Football a ngaina em em a, en pawh a peih. A thawhna thlang chiah muala naupang inkhel mai mai pawh, hun a neih phawt chuan a thlir reng țhin. A vanglai paw'n infiam a thei hle niin an sawi țhin. Zuk leh hmuam a tihawm hi ka hre hauh lo bawk!
A nuam tih ber chu, Pathian faka zai leh țawngțai a ni tih hi kan khaw pum chuan kan hria! Mitthi in-ah a țawngțai kim deuh vek zel a, mitthi chhungte khawhar an lenpuinaah pawh thusawiin, a țawngțai țhin. Bible chang a hre em em a, bahlah hauh loin a sawi țhin. Khawhar chhungte'n a hlutzia an sawi fo a, a thlamuanawm em em țhin.
Tlangkam titi-a ka hriat dan a ni a, a dik erawh ka ring. Tunhma chuan an retheiin, an berh ve hle țhin. Di in-ah an khawsa a, lo neiin tuk tin a chhuak țhin. Pathian a țih a, a rinna chu malsawmnain a zui a. A dil ni hauh loin Middle School-ah IV Grade hna a hmu! Pathian vang a ni lo thei lo.
Mi dang tan harsatna a siam ngai lo a, kan khuaa 407 Truck nei hmasa ber anni nghe nghe. Mitthi an awm a piang deuh thaw hian, mitthi chhungte hman turin an Motor hmangin tui an pe țhin. Malsawmna petu fak erawh a la sim lo a, a aia zual zawkin a la fak zel!
An Kohhran tan ban pawimawh ber a ni a. Kohhran khaipa ber a ni. Inkhawm eng ang paw'n tlem mah se, tui takin Pathian thu a sawi thei! A nunah Kohhran hian indaidanna a siam ve lo a, eng kohhranah pawh tui takin Pathian fakin a lam thei. Pu Chibai-a nun hi nun awhawm tak a ni tih hi amah hretu te chuan kan chiang viau! A thinrim hmel hmu tawh hi sawi tur an vang khawp ang.
Pathian a țihna hian a kai hruai a, malsawmna pawh a dawng nasa hle. A fate an puitling em em a, khawtlang leh kohhran tana pawimawh anni nuk!
Kum a vei zel ang a, a lo tarin a tha a lo țhum ang a. Mitthi in leh khawharin lamah a hmel hmuh tur a tlem tial tial ang a, he lei dana a khualzin kawng a tawp a, a fak țhin Pathian hnena a haw hunah chuan, a hlutzia kan hre telh telh ang a, 'Pu Chibai-a kha awwwww....' tiin a chanchin kan la sawi fo ang.
Pu Chibai-a chibai nih hlutna a zual ang a. A tel lova khawharin reh turzia ka ngaihtuah hian, ka khua a har lawk hial mai!
[A chhungte leh ama pawi ka sawi a nih chuan min ngaihdam ka beisei. Khawvel miropui ka tih zing ami a ni miau a. Ka ziak lo thei lo a ni.]
17082016
No comments:
Post a Comment